Lok'an te, bik'it chij, bik'it chij,
lok'an te, le' te bu oyot. (2)

Ba jk'opantik tal ok'il
sventa xtal slok'es chij. (2)

Li ok'il mu sk'an slok'es li chij,
li chij mu sk'an xlok' tee.

Lok'an te, bik'it chij, bik'it chij...

Ba jk'opantik tal li te'
sventa x–och tal smaj ok'il. (2)

Li te' mu sk'an smaj li ok'il
li ok'il mu sk'an slok'es li chij,
li chij mu sk'an xlok' tee.

Lok'an te, bik'it chij, bik'it chij...

Ba jk'opantik tal li k'ok'
sventa xtal schik' li te'. (2)

Li k'ok' mu sk'an xchik' li te',
li te' mu sk'an smaj li ok'il,
li ok'il mu sk'an slok'es li chij,
li chij mu sk'an xlok' tee.
Lok'an te, bik'it chij, bik'it chij...

Ba jk'opantik tal li vo',
sventa xtal stup' li k'ok' (2).

Li vo' mu sk'an stup' li k'ok',
li k'ok' mu sk'an schik' li te',
li te' mu sk'an smaj li ok'il,
li ok'il mu sk'an slok'es li chij,
li chij mu sk'an xlok' tee.

Lok'an te, bik'it chij, bik'it chij...

Ba jk'opantik tal li vuro
sventa xtal yuch' li vo'. (2)

Li vuro mu sk'an xuch' li vo',
li vo' mu sk'an stup' li k'ok',
li k'ok' mu sk'an schik' li te',
li te' mu sk'an smaj li ok'il,
li ok'il mu sk'an slok'es li chij,
li chij mu sk'an xlok' tee.

Lok'an te, bik'it chij...

Ba jk'opantik tal Paxku'
sventa xtal snit bal vuro. (2)

Li Paxku' mu sk'an snit bal li vuro,
li vuro mu sk'an xuch' li vo',
li vo' mu sk'an stup' li k'ok',
li k'ok' mu sk'an schik' li te',
li te' mu sk'an smaj li ok'il,
li ok'il mu sk'an slok'es li chij,
li chij mu sk'an xlok' tee.

Lok'an te, chij, bik'it chij...

Ba jk'opantik tal pukuj
sventa xtal yik' bal Paxku'. (2)

Li pukuj mu sk'an xik' bal Paxku',
li Paxku' mu sk'an snit bal li vuro,
li vuro mu sk'an xuch' li vo',
li vo' mu sk'an stup' li k'ok',
li k'ok' mu sk'an schik' li te',
li te' mu sk'an smaj li ok'il,
li ok'il mu sk'an slok'es li chij,
li chij mu sk'an xlok' tee.

Lok'an te, bik'it chij, bik'it chij...

Ba jk'opantik tal Jtotik
sventa xtal yik'bal pukuj. (2)

Li Jtotik ta sk'an xik'bal li pukuj,
li pukuj ta sk'an xik'bal li Paxku',
Li Paxku' ta sk'an snitbal li vuro,
li vuro ta sk'an xuch' li vo',
li vo' ta sk'an stup' li k'ok',
li k'ok' ta sk'an schik' li te',
li te' ta sk'an smaj li ok'il,
li ok'il ta sk'an slok'es li chij,
li chij ta sk'an xlok' tee.

Lok' xa uni chij, uni chij,
lok' xa ti bu oy to'ox.